Глобален аларм: Автомобилските гиганти пред прекин на производство поради „војната“ за чипови!

Хаос во авто-индустријата: Спорот меѓу Холандија и Кина за „Нексперија“ се заканува да запре фабрики ширум светот

Холандскиот производител на чипови „Нексперија“ (Nexperia) испрати драматично отворено писмо до својот кинески огранок, предупредувајќи дека глобалниот синџир на снабдување е пред колапс. Компанијата алармира дека клиентите од различни индустрии, особено автомобилската, веќе пријавуваат „непосредни прекини во производството“ поради недостиг на клучни компоненти. Ова е кулминација на спорот што започна во септември, кога холандската влада, наводно под притисок на САД, се повика на закон од времето на Студената војна за да ја преземе контролата врз компанијата, што предизвика жесток одговор од Пекинг.

„Вингтек“ обвинува за кражба на сопственоста, Европа стравува за 2026 година

Кинеската матична компанија „Вингтек Технолоџи“ (Wingtech) го блокираше извозот и ги отфрли обвинувањата на Холанѓаните, тврдејќи дека кризата е предизвикана од „нелегалното лишување од контролата и акционерските права“. Според нив, Холандија купува време за да изгради синџир на снабдување што ќе ја исклучи Кина. Иако се работи за евтини чипови (транзистори и диоди), тие се витални за системите за сопирање, воздушните перничиња и електрониката во возилата. Гигантите како „Нисан“, „Бош“, „Фолксваген“ и БМВ се во состојба на тревога, предупредувајќи на сериозни ризици за снабдувањето во првиот квартал од 2026 година.