„За еден час земам 50 евра“, јутјуберот Нено откри како се живее како крал на Балканот

Можете ли да верувате дека некои хрватски гејмери денес заработуваат и до 50 евра за само еден час играње?

Во светот тој износ е и десет пати поголем. Гејминг индустријата во Хрватска повеќе не е само хоби – таа вработува илјадници луѓе, носи милионски приходи и создава дигитални ѕвезди.

Сепак, зад сјајот на професионалните турнири и популарните стримери се крие и помрачна страна на интернетот. За тоа, но и за случаите кога децата трошат стотици евра без знаење на родителите, зборуваше познатиот хрватски Јутјубер Нено Хаџихајдиќ, познат како PvtMoleEster, во подкастот на net.hr „Идеје на столу“. Неговиот канал го следат околу 140.000 луѓе.

Гејмингот во Хрватска

Гејминг индустријата во Хрватска расте од година во година. Првите заедници се појавиле уште во деведесеттите, а во 2022 година е остварена заработка од 61,4 милиони евра. – Гејмингот денес не е само играње – тоа е сектор кој вработува илјадници луѓе и брзо се развива – вели Нено. Како пример го наведува Гејминг центарот во Новска, место каде што младите можат да учат 3Д моделирање и дизајн на видео-игри.

Тој потсети и на хрватските успешни приказни, како играта „Serious Sam“ од 2001 година, создадена во загрепското студио Croteam, која стана светски хит, како и „SCUM“, која донесе милионски приходи.

Заедница и пријателства

Нено почнал уште во времето на „Commodore“, но денешната сцена е многу повеќе од забава: – Не поминуваме часови само играјќи. Тука се создаваат пријателства, и тоа со луѓе надвор од Хрватска. Ние сме околу 15 луѓе во WhatsApp група, се дружиме и надвор од игрите, одиме на скари – тоа е вистинска заедница која не исчезнува кога ќе се исклучи компјутерот.

Заработка и професионализам

Хаџихајдиќ истакнува дека од гејминг може многу добро да се живее. – „Coaching“, односно подучување на други играчи, се движи од 50 евра по час кај нас, до 500-600 евра во светот. Тука е и „бустањето“ на профили, кога некој игра за вас и ви го крева рангот, што дополнително се наплаќа – вели Нено.

Квалитетно видео бара големи вложувања: камери, микрофони, осветлување… само добар компјутер чини 4-5 илјади евра, а најскапите и до 20 илјади. Заработката на Јутјуб зависи од јазикот и публиката. – Приближно е 1 долар на илјада прегледи, додека во САД може да биде и десет пати повеќе – вели тој.

Одговорност и безбедност

Сè повеќе брендови денес соработуваат со стримерите бидејќи публиката им верува на омилените гејмери. – Ако мене ме следат 100.000 луѓе, постои доверба. Кога јас ќе претставам производ, тие ќе го погледнат – вели Нено. Сепак, не оди сè мазно. – Мораш да поставиш граници. Кога некого ќе банирам, и понатаму може да гледа, но не и да коментира. Досега имам суспендирано повеќе од 2000 лица само на Јутјуб – открива тој.

Опасностите на интернетот

Како амбасадор на PlayStation, тој се залага за одговорно играње: – До 13-годишна возраст децата не би смееле да имаат пристап до интернет без надзор. Сè тргнува од дома и од родителите – предупредува тој. Нено се сеќава на шокантен случај: – Едно дете потроши 600 евра од картичката на мајка си за само два дена. Парите не можат да се вратат, а детето мисли дека не направило ништо лошо.

Тој зборува и за проблемот со предаторите и сајбер-малтретирањето. За европскиот надзор на комуникациите, т.н. „Chat Control“, Хаџихајдиќ вели дека е „деликатна рамнотежа“: – Јас велам слободно – гледајте. Немам што да кријам. Ги разбирам и оние кои се против, но и потребата за заштита на децата.