Монструозно злосторство во Италија: Странски работници живи запалени во автомобил!

Монструозно злосторство ја потресе Италија откако четири странски земјоделски работници беа живи изгорени во автомобил во градот Амендолара. Жртвите се тројца авганистански и еден пакистански државјанин. Италијанската полиција брзо реагираше и уапси двајца осомничени Пакистанци за ова тешко убиство. Единствениот преживеан Авганистанец, кој се спасил кршејќи го прозорецот, е клучниот сведок во истрагата.

Сведоштво од пеколот: „Ова е дело на мафијата“

Преживеаниот работник откри дека мотивот за убиството се неисплатени дневници и изнуда. На работниците им биле ветени по 45 евра дневно за берба на јагоди, но наместо плата, посредниците им барале пари за превоз. Кога жртвите одбиле да платат, осомничените ја полеале внатрешноста на возилото со бензин и фрлиле запалка. Сведокот тврди дека убијците биле дел од „пакистанска мафија“ која со оружје ги принудувала на бесплатна работа.

Камерите го снимиле блокирањето на вратите

Пожарот избувнал во близина на бензинска пумпа, а пожарникарите едвај спречиле поголема катастрофа со резервоарите за гориво. Безбедносните камери ја потврдиле бруталноста на нападот, прикажувајќи како двајцата осомничени ги блокираат вратите однадвор пред да го запалат возилото. Ова е само најново во низата насилни злосторства и судири меѓу мигрантските групи кои работат на италијанските полиња.