Повеќе од само бура: „Мелиса“ е најсилниот хорор на Карибите во последните 90 години

Бермудските острови се подготвуваат за ударот на ураганот Мелиса, кој денес пристигнува по своето разорно патување низ Карибите.

Бурата, која зад себе остави пустош во Јамајка, поплави во Куба и 24 жртви во Хаити, продолжува да се движи со огромна сила, предупредуваат метеоролозите.

Повеќе од само бура – најсилната во 90 години

Според Националниот центар за урагани на САД (NHC), временските услови на Бермуда ќе се влошат во доцните попладневни часови и вечерта, кога се очекуваат налети на ветер што ќе достигнат до 150 километри на час.

Ураганот Мелиса, кој во вторникот ја погоди Јамајка како бура од највисоката — петта категорија, беше најмоќниот што стигнал до копното во последните девет децении. Ветровите со брзина од околу 300 километри на час предизвикаа масовна штета.

Во Куба, каде што поројните дождови предизвикаа поплави и урнување на покриви, властите соопштија дека нема човечки жртви, но материјалната штета е огромна. Во меѓувреме, Хаити, кој не беше директно погоден, но претрпе тешки последици од дождовите, брои најмалку 24 загинати, меѓу кои и десет деца, додека 18 лица сè уште се водат како исчезнати.

Климатските промени ја засилиле бурата

Според најновата анализа на климатолози од Империјал колеџ во Лондон, климатските промени предизвикани од човекот придонеле ураганот Мелиса да биде значително помоќен и поразорен од сличните бури во минатото.