Силен земјотрес од 7,4 степени ги погоди Филипините, се заканува цунами

Силен земјотрес од 7,4 степени ги погоди Филипините, издадено предупредување за цунами, народот се евакуира

Силен и плиток земјотрес со јачина од 7,4 степени според Рихтеровата скала денес го погоди јужниот филипински остров Минданао, предизвикувајќи паника и активирајќи предупредување за цунами во регионот. Властите наредија итна евакуација на крајбрежните области, додека првичните информации говорат за најмалку една жртва.

Според Американскиот геолошки институт (USGS), епицентарот на земјотресот бил на длабочина од само 25 километри, на околу 20 километри од брегот, што го зголемува ризикот од создавање на големи бранови. Земјотресот се случил во 9:43 часот наутро по локално време.

Пацифичкиот центар за предупредување од цунами веднаш издаде соопштение дека се можни опасни цунами-бранови во радиус од 300 километри од епицентарот, што ги опфаќа делови од Филипините и Индонезија. Локалните власти на Филипините ги повикаа жителите на источните крајбрежни области веднаш да се преселат на повисоки места.

Паника и евакуација

Снимките од регионот покажуваат како луѓето во паника ги напуштаат своите домови и работни места, а во тек е и евакуација на училиштата. Овој земјотрес доаѓа само 11 дена по разорниот потрес што го погоди централниот остров Себу, во кој загинаа 74 лица, а десетици илјади останаа без своите домови, што дополнително го зголемува стравот кај населението.

Зошто Филипините се толку подложни на земјотреси?

Филипините се наоѓаат на таканаречениот „Огнен прстен на Пацификот“ – појас околу Тихиот Океан каде што се случуваат околу 90% од сите земјотреси во светот. Овој регион е место на судир на неколку големи тектонски плочи, што го прави еден од најсеизмички најактивните во светот.

Во моментов, сите очи се вперени кон брегот на Минданао, додека светот со загриженост чека информации за можните последици од цунамито и за состојбата на илјадниците луѓе кои се погодени од овој силен потрес.