Стариот трик што сè уште „пали“: Не купувајте половен автомобил пред да ја прочитате оваа приказна

ГО КУПИЛ „БЕСПРЕКОРНИОТ“ VW GOLF ОД ИТАЛИЈА: Кога ја тргнал изолир-траката од таблата, доживеал шок – бил скриен огромен дефект

Купувањето половен автомобил преку интернет секогаш носи доза на ризик, но еден купувач од Италија на потешкиот начин научил колку далеку може да оди бескрупулозноста на продавачите. Тој нарачал „беспрекорен“ Volkswagen Golf 1.6 TDI, но по само неколку дена возење, открил дека под маската на сјајната боја се крие сериозен проблем, маскиран со стар и добро познат трик.

Човекот го купил автомобилот преку онлајн оглас, во кој стоело дека возилото е „во одлична состојба, без никакви дефекти“ и со уредна сервисна историја. Меѓутоа, по неколку дена возење, тој забележал мало парче црна изолир-трака на контролната табла.

Кога љубопитно ја одлепил траката, доживеал шок. Под неа светела предупредувачката „Check Engine“ светилка, која сигнализира сериозен проблем со моторот. Тоа бил јасен и намерен обид на продавачот да го прикрие дефектот.

Стар трик што сè уште „пали“

Според експертите, ова е еден од најстарите трикови што ги користат нечесните продавачи. Тие едноставно ја прелепуваат светилката со трака, или уште полошо, ја отстрануваат сијаличката одвнатре, за купувачот да мисли дека сè е во совршен ред.

Откако ја открил измамата, новиот сопственик подетално го прегледал возилото и забележал и други знаци на интензивна употреба: истрошен волан и рачка од менувачот, изгребана пластика и неисправни прекинувачи за прозорците. Сето ова укажувало на тоа дека автомобилот поминал многу повеќе километри отколку што покажувала километражата во огласот.

Повеќе од само измама – лекција за сите купувачи

Овој случај е уште едно предупредување за ризиците при купување на половни возила, особено од увоз. Враќањето на километражата и прикривањето на дефектите се честа практика. Затоа, експертите советуваат никогаш да не купувате автомобил без темелна проверка.

Првиот чекор е проверка на идентификацискиот број на возилото (VIN) преку онлајн сервиси кои можат да ја откријат неговата историја на сервисирање и евентуални несреќи. Вториот, уште поважен чекор, е да го однесете возилото во ваш сервис од доверба на детален технички преглед пред да ги дадете парите.

Искуството на овој купувач е горчлива, но важна лекција. Во дигиталната ера, каде што сè може да се „фотошопира“ за да изгледа совршено, најдобрата заштита останува здравиот разум и темелната проверка во живо.