ТРАМП ГИ НАМАЛУВА ЦАРИНИТЕ: Поевтинуваат кафето, бананите и говедското месо!

Трамп ги укинува царините за говедско месо, кафе, банани и други намирници!

Претседателот на Соединетите Американски Држави, Доналд Трамп, иззеде одредени прехранбени производи, вклучувајќи говедско месо, кафе и банани, од своите високи царини, објави CBS. Според извршната наредба, новото изземање опфаќа низа тропски производи кои често се увезуваат во САД, вклучувајќи кафе, чај, банани, манго, авокадо, кокос, ананас, какао и зачини.

Повеќе од само храна – договор со Латинска Америка

Белата куќа соопшти дека Трамп одлучил да ги изземе овие производи бидејќи е постигнат „значаен напредок“ во преговорите за трговски договори со други земји. Еден ден претходно, тој најави рамковни трговски договори со четири земји од Латинска Америка – Аргентина, Гватемала, Ел Салвадор и Еквадор, кои вклучуваат олеснувања за храна што во САД не се произведува во големи количини.

Прехранбените производи повеќе нема да бидат опфатени со „реципрочните“ тарифи, кои се движеа од 10 до 40 проценти. Трамп изјави дека изземањата треба да придонесат за пад на цените и главно се однесуваат на храна која „не е конкурентна во оваа земја“, како што се бананите. „Не ги произведуваме овде, така што нема потреба да ја штитиме домашната индустрија“, рече тој.

Трамп против сточарите: „Мора да ги намалат цените!“

Овој потег доаѓа откако минатиот месец Трамп рече дека размислува за увоз на поголема количина говедско месо од Аргентина за да ги намали цените. Трговските групи, како Националното здружение на сточари, јавно ја критикуваа таа идеја. Како одговор, Трамп на „Truth Social“ напиша дека сточарите „мораат да ги намалат цените“.

„Сточарите, кои ги сакам, не разбираат дека единствената причина зошто им оди добро… е тоа што воведов царини на увоз на стока во САД. Да не бев јас, ќе го правеа истото што го правеа во последните 20 години – ужасно“, истакна Трамп.