Хеликоптерот на МВР со 7 налети и 10 тони вода го гаснеше пожарот кај Блаце

Во седум налети, хеликоптер на МВР исфрли 10 тони вода за гаснење на пожарот во реонот на Блаце.

Потоа, поради настапувањето на ноќните услови, леталото се вратило во својата база. Оваа информација вечерва ја соопштија од Министерството за внатрешни работи. Тие потврдија дека акцијата била успешна.

Полициски службеници од Хеликоптерската единица за полициски намени при МВР се вклучија во активностите за гаснење. Ова се случило по претходно добиено барање од страна на Центарот за управување со кризи (ЦУК). Акцијата била спроведена со хеликоптер од типот Бел 412.

Пожарот кај Блаце е меѓу петте активни пожари на отворено во државава. На терен интервенира и Бригадата за противпожарна заштита на Град Скопје. Тие учествуваат со пет возила и со вкупно 20 пожарникари, кои се борат со огнената стихија.