Арсовска со жесток одговор: „Од денес ќе ги објавувам документите за сѐ што се правело во Чаир!“

Градоначалничката на Скопје, Данела Арсовска, утрово ја шокираше јавноста со нова објава на социјалните мрежи. Таа отворено праша: „По заканите врз мене не постапуваат, дали по доказите ќе постапат? Не верувам“.

Оваа изјава следи по нејзините претходни тврдења за закани по животот и жестокиот конфликт со градоначалникот на Чаир, Висар Ганиу, кого го обвинува за криминал и легализации на дивоградби.

Остри критики кон Мицкоски: „Зошто ги штити господинот Ганиу и господинот Меџити?“

Данела Арсовска директно го нападна премиерот Христијан Мицкоски, прашувајќи зошто ги штити, како што таа ги нарекува, „господинот“ Ганиу и „господинот“ Меџити.

„Мицкоски вчера наместо да постапува по обелоденетите криминали на Висар Ганиу каде се вртат милиони, да побара итно надлежните институции да делуваат за нешто за што има информација дека се уништуваат докази, тој почна да тера политика и да ми се заканува со девалвации ставајќи се во одбрана на неодбранливото“, напиша таа.

Арсовска јасно порача: „Мицкоски јас и најлоша да сум, ти треба криминалциве да ги спречиш, не да ги браниш, па макар и браќа да ти се – а не ти се“.

Јавно објавување на докази: Цел на транспарентност и притисок врз институциите

Градоначалничката Арсовска најави дека од денеска јавно ќе ги објавува сите документи што Град Скопје ги доставило до институциите. „Од денес, јавно и со појаснување за сѐ, ќе ги објавувам документите кои се доставени до институциите и обвинителството, а секој граѓанин ќе може да види што се правело“, пишува Арсовска.

Таа изрази надеж дека Обвинителството ќе мора неодложно да ги обезбеди во целост документите за предметите од Висар Ганиу и Ејуп Адеми „пред да ги уништат“. Оваа одлука за целосна транспарентност претставува директен притисок врз судските органи и ги става во фокус обвинувањата за криминал и корупција во Општина Чаир.