Бил Гејтс со шок-одлука: Зошто неговите деца ќе добијат само трошки од милијардите

Бил Гејтс со лекција за милијардерите: „Моите деца ќе наследат помалку од 1%, ова не е династија“

Бил Гејтс, еден од најбогатите луѓе во светот, ја потврди својата долгогодишна филозофија дека нема намера да им остави огромно богатство на своите три деца. Во ново интервју, коосновачот на Мајкрософт откри дека неговите деца ќе наследат „помалку од еден процент“ од неговото богатство од 107 милијарди долари, бидејќи тој сака тие сами да го изградат својот пат и да не живеат во сенката на неговиот успех.

Гостувајќи во подкастот „Figuring Out With Raj Shamani“, Гејтс беше прашан за неговиот став кон наследувањето на богатството. „Секој одлучува за себе, а во мојот случај, моите деца имаа одлично детство и образование, но ќе добијат помалку од еден процент од вкупното богатство, бидејќи решив дека нема да им правам никаква услуга ако наследат повеќе“, одговори тој. Иако дури и 1% од неговото богатство претставува огромна сума (над 1 милијарда долари), тоа е симболичен износ во споредба со целата империја.

Причината зад оваа одлука, вели Гејтс, е желбата тие да развијат сопствена работна етика и амбиција. „Ова не е династија, не ги молам да го водат Мајкрософт. Сакам да им дадам можност сами да заработуваат пари и да успеат“, рече тој, додавајќи дека сака неговите деца да изградат нешто свое, а не цел живот да бидат дефинирани од „неверојатната среќа и привилегии што ги имал нивниот татко“.

Наместо да го пренесе богатството на децата, Гејтс веќе со години е еден од најголемите филантропи во светот. Поголемиот дел од неговото богатство ќе биде дониран во Фондацијата Бил и Мелинда Гејтс, која се бори против сиромаштијата и болестите ширум светот. Тој нагласи дека е важно децата рано да ја разберат оваа филозофија. „Не сакате вашите деца никогаш да бидат збунети околу вашата поддршка и љубов кон нив… Крајната цел на тие ресурси е да им се врати на оние на кои им е најпотребна“, објасни тој, изразувајќи надеж дека неговите деца се горди на работата на фондацијата.

Гејтс дури забележал и промена кај новите генерации богаташи. „Видов случаи каде што децата им рекле на своите родители да бидат повеликодушни. Мислам дека помладата генерација понекогаш всушност ја отфрла идејата дека богатството едноставно е наследено“, рече тој. Оваа филозофија е дел од поширокото движење меѓу ултра-богатите, предводено од иницијативата „The Giving Pledge“ на Гејтс и Ворен Бафет, каде што милијардери се обврзуваат да донираат поголем дел од своето богатство во добротворни цели, наместо да го остават на своите семејства.