Дали вашето куче е малку „буцко“? Oвие три совети ќе го вратат во форма

Ако вашето куче има вишок килограми, големи се шансите тоа да се соочи со некои здравствени проблеми.

Прекумерната тежина кај кучињата може да доведе до дијабетес, проблеми со зглобовите и други болести, а освен тоа, таквите кучиња во просек живеат околу 2,5 години пократко од оние со идеална тежина. Иако ова звучи загрижувачки, сопствениците можат многу да направат, особено кога е во прашање исхраната, за да спречат ситуацијата да стане сериозна.

На прв поглед, заобленото куче може да изгледа слатко, но вишокот килограми носи сериозни ризици – од оптоварување на срцето и потенцијални срцеви проблеми, преку тешкотии со белите дробови и зглобовите, до зголемен ризик од дијабетес и хронични болести. Таквото куче е помалку активно, има помалку енергија и се соочува со пократок и потежок живот.

Затоа, секој сопственик на куче би требало да обрне внимание на неколку едноставни, но важни правила кои ќе му помогнат на неговиот миленик да остане во добра форма, здрав и задоволен.

1. Обезбедете доволно движење низ игра

Кучето не мора да има напорни тренинзи – доволно е редовно да шета, да трча по топка, да си игра со носење предмети или да се забавува во куќата. Активноста низ игра е најдобриот начин да остане фит.

2. Водете сметка за исхраната и количината на „награди“

Премногу грицки можат брзо да доведат до вишок килограми. Наместо купечки „награди“ кои често се полни со празни калории, понудете му на кучето поздрава алтернатива – парче варено месо или малку овошје и зеленчук кои се безбедни за кучиња. Така ќе ужива во „наградата“, а вие ќе знаете дека правите нешто добро за неговото здравје.

3. Редовно следете ја тежината на вашиот миленик

За да знаете дали вашето куче е во идеална форма, најдобро е да се посоветувате со ветеринар. Тој може, врз основа на расата, начинот на исхрана и општото здравје, да процени колкава би требало да биде неговата тежина.

Сепак, и самите можете да забележите дали вашето куче има вишок килограми. Погледнете го одозгора и од страна — куче кое е во добра кондиција има забележлива половина зад градниот кош и благо вовлечен стомак. Ако таа линија ја нема и стомакот виси, веројатно се насобрале вишок килограми. Ребрата би требало лесно да се напипаат, но не и да бидат видливи.

Обрнете внимание и на однесувањето – ако кучето брзо се заморува, тешко се движи или избегнува игра, тоа може да биде знак дека вишокот тежина му го отежнува движењето.