‘За нив спортот е играње фудбал во канцеларија’: Малиша Станковиќ со жестока критика до Битиќи

Малиша Станковиќ загрме во Собрание: „СДСМ и ДУИ сакаат да кратат пари од спортот за да прават фешти и прослави“

Жестока дебата се разви денеска на Комисијата за финансирање и буџет во македонското Собрание, каде пратеникот од коалицијата на ВМРО-ДПМНЕ, Малиша Станковиќ, остро се спротивстави на амандманите поднесени од опозицијата. Во фокусот на расправата беше барањето на пратеникот Фатмир Битиќи и група пратеници од СДСМ и ДУИ, кои побараа кратење на средствата предвидени за субвенции во спортот, со цел тие пари да се пренасочат за организирање на прославата за Охридскиот рамковен договор. Станковиќ го оцени овој потег како продолжување на старите навики за трошење државни пари на веселби наместо на суштински потреби.

Од 2 на 6 милиони за прослави, на штета на спортистите

Станковиќ детално ја објасни „математиката“ на опозицијата пред граѓаните, потенцирајќи дека ова е координиран напад врз буџетот за спорт. Според него, првично колегите од ДУИ поднеле амандман со кој барале сумата за чествување на Рамковниот договор да се зголеми од два на пет милиони денари, а разликата од три милиони да се земе директно од субвенциите за спорт. Но, тука не застанала работата. На овој амандман се надоврзале и пратениците од СДСМ, кои сметале дека тоа е малку, па побарале уште поголемо кратење.

„Социјалдемократскиот сојуз смета дека и тоа е малку, па оди со амандман и вика не, шест милиони се потребни. Наместо два милиони денари, шест милиони да станат и тие четири милиони, исто така ги одземаат од спортот“, истакна Станковиќ, разобличувајќи го планот на опозицијата да обезбеди повеќе пари за прослави на сметка на развојот на спортот.

„За нив спортот е играње фудбал во канцеларија“

Во својот говор, Станковиќ не пропушти да ја потсети јавноста на минатото однесување на функционерите од сегашната опозиција, алудирајќи на виралните снимки од претходната власт каде што се играше фудбал во државни институции. Тој нагласи дека не е изненаден од ваквиот однос кон спортот, бидејќи за нив тој очигледно претставува само забава во канцеларија или скапа фешта.

„Јас не сум изненаден на ваквиот тип на амандман, бидејќи луѓе коишто спортот до сега го рачунаа дека е играње на фудбал во канцеларии, а чествувањата беа со по 300 илјади евра, така се навикнати. Тие се навикнати за спорт да се дава помалку пари, а повеќе пари да се дава на фешти“, децидно рече Станковиќ. Тој заклучи дека ваквиот амандман е апсолутно неприфатлив и дека владејачкото мнозинство нема да дозволи парите наменети за спортистите да завршат на скапи прослави и настани кои немаат врска со реалните потреби на граѓаните.