„Инстаграм“ и сериите ќе ви го избираат одморот: Како изгледа иднината на AI патувањето и одморот?

Како вештачката интелигенција ќе го трансформира патувањето до 2035 година

Светот на патувањата ќе доживее голема трансформација во наредната деценија. Според извештајот на компанијата „Омио“, вештачката интелигенција (ВИ) ќе игра клучна улога во начинот на кој ги планираме и доживуваме патувањата. Од креирање персонализирани рути до спонтани резервации инспирирани од филмови, ВИ ќе го направи патувањето целосно приспособено на нашите потреби и желби.

Патувачките платформи веќе нема да бидат само места за резервација. Тие ќе се приспособуваат на емоциите и потребите на патниците во текот на целото патување. Овој тренд ќе биде особено важен за генерацијата Алфа, која расте со технологија. Тие ќе имаат поинаков поглед на патувањата. За нив, светот е достапен и поврзан како никогаш досега.

Еден од најинтересните трендови е резервирањето патување според содржините што ги гледаме. „Омио“ предвидува дека платформите за патување ќе се интегрираат во забавните содржини. На пример, ако ви се допадне локација од некоја серија, ќе можете со еден клик да го резервирате патувањето.

Иднината на патувањата: Персонализација и ефикасност со помош на ВИ

Планирањето патувања ќе стане поимпулсивно. Луѓето веќе нема да планираат со месеци однапред. Наместо тоа, ќе резервираат патувања спонтано, инспирирани од содржини на „Инстаграм“ и „Јутјуб“. Алатките на вештачката интелигенција ќе ги усогласуваат патничките содржини со нашите преференции. Покрај тоа, ВИ ќе овозможи максимална персонализација. Ќе креира планери за патување кои знаат сѐ за нашиот буџет, навики и омилени места. Автоматизираната корисничка поддршка ќе ја направи комуникацијата брза и ефикасна.

Друга важна промена е борбата против прекумерниот туризам. Вештачката интелигенција може да ги пренасочи туристите кон помалку познати локации. Исто така, ќе поттикне патувања надвор од сезона. Интермодалните патувања, односно користење повеќе видови на превоз во едно патување, ќе станат стандард. Сето ова ќе ја направи туристичката индустрија пофлексибилна и поодржлива. До 2029 година, дури 73% од туристичката продажба ќе биде онлајн.