МВР конечно постапува за дивоградбите во Чаир: Борбата против криминалот е бескомпромисна!

Министерството за внатрешни работи активно работи на утврдување на случаи на дивоградби.

Ова денеска го најави министерот за внатрешни работи, Панче Тошковски. Тој вети дека резултатите од овие постапки ќе бидат видливи во скоро време. Тој потврди дека постои наредба од јавен обвинител и дека МВР веќе постапува по истата.

„Ќе постапиме како што ѝ прилега на една европска земја“

„Во однос на тоа дали има наредба од страна на јавен обвинител, да, има и ние постапуваме,“ рече Тошковски. „Ве уверувам дека како за сите предмети, така и во иднина нема да оставиме под знак прашалник ниту еден конкретен предмет.“

„Ќе постапуваме така како што и прилега на една европска земја. За разлика од тие претходно, ние не сме Европејци само декларативно, тоа го покажуваме со дела,“ додаде тој. Тој истакна дека сега има неселективна и бескомпромисна борба против секој што се огрешил пред законот. Како доказ, тој го наведе постапувањето против судии, директори и градоначалници.

Потсетување на обвинувањата на Арсовска

На прашањето дали е утврден конкретен случај на дивоградба во Чаир, Тошковски изјави дека нема конкретни информации. Но, тој увери дека се постапува и дека резултатите ќе бидат видливи наскоро. Да потсетиме, градоначалничката Арсовска поднесе повеќе пријави.

Обвинителството веќе почна постапка по првата пријава за фалсификати поврзани со градби во Чаир. Истрагата се однесува на сомневања за фалсификување на документи и незаконска легализација. Арсовска го поврзува ова директно со градоначалникот на Општина Чаир, Висар Ганиу.