Мистериозни слики во телефонот? Не, само сте заборавиле на оваа опција на WhatsApp

Дали некој ви го хакирал телефонот? Не, само сте заборавиле да ја исклучите оваа опција на WhatsApp

Во еден од оние моменти кои се совршен приказ на модерната дигитална параноја, една жена останала во шок откако во галеријата на својот телефон пронашла три бизарни фотографии кои никогаш не ги сликнала. Убедена дека телефонот ѝ е хакиран, таа побарала помош на социјалната мрежа Reddit. Решението на мистеријата, сепак, било многу поедноставно и служи како важна лекција за сите корисници на паметни телефони.

Приказната, која стана вирална, започнала кога жената, прегледувајќи ги своите фотографии, наишла на три слики кои не можела да ги објасни. Првата прикажувала мрачна просторија со ѕидови од тули, втората врата со натпис „не отворај“, а третата тава со две јајца, од кои едното имало дупла жолчка. „Немам поим од каде се појавија. Дали некој има идеја? Дали ми е хакиран телефонот?“, напишала таа, видно вознемирена.

Нејзината објава предизвика лавина од коментари и теории – од грешки во софтверот до паранормални објаснувања. Сепак, еден корисник го понудил наједноставното, а на крајот и точното решение. „Дали некој можеби ти ги пратил фотографиите преку WhatsApp? Мене понекогаш ми се појавуваат слики од други луѓе во галеријата“, напишал тој.

Жената веднаш проверила и сфатила дека токму тоа е одговорот. „Во право сте! Член сум на една WhatsApp група која никогаш не ја проверувам и за која сум ги исклучила нотификациите. Целосно заборавив дека апликацијата го прави тоа. Никогаш не би ми паднало на памет“, одговорила таа.

Како да спречите WhatsApp да ви ја полни галеријата?

Овој случај е совршен потсетник за една стандардна поставка на апликациите за комуникација како WhatsApp и Viber, која многумина не ја знаат. Станува збор за автоматското преземање на медиуми (Automatic media download). Оваа опција, која најчесто е вклучена по дифолт, автоматски ги зачувува сите фотографии и видеа што ќе ги добиете во разговорите, директно во галеријата на вашиот телефон. Ова не само што може да доведе до збунувачки ситуации како оваа, туку и непотребно ви ја троши меморијата на телефонот.

Како да ја исклучите оваа опција на WhatsApp:

1. Отворете ја апликацијата и одете во Settings (Поставки).
2. Изберете ја опцијата Storage and Data (Меморија и податоци).
3. Под делот „Media auto-download“, ќе видите три опции: кога користите мобилни податоци, кога сте на Wi-Fi и кога сте во роаминг.
4. Кликнете на секоја од нив и одштиклирајте ги полињата за Photos, Audio, Videos и Documents.

Со овој едноставен чекор, вие ќе ја вратите контролата врз вашата галерија. Фотографиите и видеата сè уште ќе ви пристигнуваат во разговорите, но во вашата галерија ќе се зачуваат само оние што вие рачно ќе ги зачувате. Оваа приказна, која започна со страв од хакери, на крајот заврши како корисна лекција за сите нас – понекогаш, најголемата мистерија на нашиот телефон не е некој вирус, туку некоја заборавена поставка.