НАЈГОЛЕМИОТ СКАНДАЛ ВО КИЕВ: Партнерот на Зеленски избегал од земјата по истрагата за корупција во „Енергоатом“!

Истрагата за корупција во државната нуклеарна компанија „Енергоатом“ се претвора во еден од најголемите политички скандали во историјата на Украина.

Наводниот организатор е Тимур Миндич, близок соработник на претседателот Володимир Зеленски и косопственик на претседателската продукциска куќа „Квартал 95“. Според извештаите, Миндич бил предупреден и ја напуштил земјата пред да биде подигната обвинителница.

Во меѓувреме, под лупа се најдоа и други моќни личности. Според Националното биро за борба против корупција (НАБУ), меѓу инволвираните се и поранешниот вицепремиер Олексиј Чернишов, утринава сменетиот министер за правда Герман Галушченко (кој претходно беше министер за енергетика) и Рустем Умеров, поранешен министер за одбрана, а сегашен секретар на Советот за национална безбедност.

„Професор“, „Ракета“ и „Че Гевара“ вмешани во аферата

Во вторник, НАБУ подигна обвиненија против осум лица за примање мито и злоупотреба на положбата. Објавени се и снимки на кои групата, користејќи шифри, разговарала за провизии.

На снимките, Миндич го користи псевдонимот „Карлсон“. Друг обвинет е Ихор Мироњук („Ракета“), поранешен советник на министерот за енергетика. Според снимките, учесниците наводно му дале 1,2 милиони долари и 100.000 евра на поранешниот вицепремиер Чернишов, познат како „Че Гевара“.

Од осумтемина обвинети, Миндич и уште еден бизнисмен („Sugarman“) се во бегство, додека петмина се приведени. Специјалниот обвинител изјавил дека Миндич незаконски влијаел врз Галушченко („Професор“) и Умеров. Умеров ги негираше обвинувањата.

Како функционирала шемата?

Мироњук и Басов („Тенор“) наводно земале провизии од 10-15% од договорните партнери на „Енергоатом“ за да ги задржат како добавувачи. Учесниците во шемата вршеле притисок врз добавувачите, заканувајќи им се дека ќе ги уништат и дека „сите нивни вработени ќе бидат мобилизирани во војска“.

На снимките, учесниците исто така се противат на изградбата на заштитни инсталации за енергетските објекти од руски напади, велејќи дека е „фрлање пари“, освен ако не можат да ги доделат договорите на компанија што ја контролираат за да заработат од проектите.

Која е улогата на Миндич?

НАБУ наведе дека активностите на перењето пари биле под контрола на Миндич од зградата во улицата Хрушевски – каде што и Миндич и Зеленски имаат станови. На снимките се слуша и разговор меѓу Миндич и Галушченко, како и разговор каде Миндич договара исплати од 3 милиони долари во Швајцарија и 1 милион во Израел за купување куќа.