„Работата ќе биде задоволство“: Илон Маск ја предвиде иднината без работни места

Американскиот милијардер и основач на Тесла, Илон Маск, повторно предизвика лавина од коментари изјавувајќи дека во иднина вештачката интелигенција и роботите ќе ги преземат сите работни места.

Според него, за луѓето работата ќе стане прашање на личен избор и задоволство, а не на неопходност.

Маск на својата мрежа Х објасни дека работата, како одгледувањето зеленчук, ќе биде активност што луѓето ќе ја изберат за уживање, а не поради потребата да заработат пари. Неговото соопштение уследи по веста дека „Амазон“ планира да замени околу 600.000 работници со роботи до 2033 година, што дополнително ги разгоре дискусиите за иднината на пазарот на трудот.

Повеќе од само утопија – што велат експертите?

Иако технолошките компании и инвеститорите предвидуваат брзи промени, независните анализи сугерираат дека транзицијата ќе биде постепена. Меѓународната организација на трудот (МОТ) наведува дека приближно една четвртина од работните места во светот би можеле значително да се *променат* под влијание на вештачката интелигенција, но тоа не значи дека луѓето масовно ќе ги изгубат своите работни места.

Наместо целосно исчезнување, од многу вработени се очекува да го променат начинот на кој работат – прилагодувајќи се на новите технологии, додека фокусот сè повеќе се префрла на креативни и стратешки задачи. Најавата на Илон Маск, иако футуристичка, отвора важна општествена дебата: што ќе значи „работа“ во светот на вештачката интелигенција – и дали таа воопшто ќе биде неопходна за преживување, пишува Политика.