‘Сакам да знам кој го уби мојот син Стефан’: Дијана Хрка почнува штрајк со глад

‘Сакам да знам кој го уби моето дете’: Мајката на Стефан Хрка најави штрајк со глад пред Градското собрание во Нови Сад

На денешниот болен комеморативен собир во Нови Сад, точно на годишнината од трагедијата во која загинаа 16 лица, Дијана Хрка, мајката на 27-годишниот Стефан Хрка, најави дека од утре (2 ноември) ќе започне штрајк со глад. Нејзиниот очајнички потег е последен обид да се избори за правда и одговорност, кои, според неа, институциите една година ги игнорираат.

Во емотивниот говор пред илјадниците насобрани граѓани и студенти пред железничката станица, Хрка порача дека нема да се откаже. „Ова е мојата борба што морам да ја доведам до крај. Сакам да знам кој го уби моето дете и кој уби 16 луѓе. Некој мора да одговара за ова“, изјави таа, најавувајќи дека ќе штрајкува со глад пред Градското собрание во Нови Сад.

„Студентите ме одржуваат во живот“

Дијана Хрка упати посебна благодарност до студентите, кои во изминатата година беа најгласниот глас на отпорот и организатори на масовните протести. „Благодарам на студентите што ме одржуваат во живот, на сите луѓе што се со мене. Денес Нови Сад плаче, но јас се борам за тоа никогаш повеќе ниту една мајка да не заплаче“, порача таа.

Нејзината најава доаѓа по една година исполнета со гнев и фрустрација, во која судскиот епилог за уривањето на надстрешницата сè уште е блокиран. Иако веднаш по несреќата беа уапсени неколку лица поврзани со реконструкцијата, до денес нема правосилна пресуда, што граѓаните го толкуваат како обид на власта да ја прикрие одговорноста.

Потсетување за македонската жртва Васко Саздовски

Меѓу 16-те жртви кои на 1 ноември 2024 година беа поклопени од бетонската надстрешница, беше и 45-годишниот македонски државјанин Васко Саздовски. Тој бил професор на Институтот за роботика во Нови Сад. Кобниот ден, Васко Саздовски чекал воз на станицата со кој требало да се врати во Македонија, каде што живеело неговото семејство.

Штрајкот со глад на Дијана Хрка, кој започнува утре, е најрадикалниот чин досега во борбата за правда. Тоа е лична битка на една мајка за нејзиниот син, но и симболичен чин на отпор во името на сите 16 изгубени животи, вклучително и оној на Васко Саздовски, кои чекаат одговорност.