Салата од лубеница и фета што ова лето ја служат во Париз, Милано и Њујорк

Салата од лубеница и фета сирење е летниот рецепт што изгледа едноставно, но на маса носи вкус како од ресторан. Слатката лубеница, солената фета, свежата рукола и ароматичните билки се спој што ова лето се служи во Париз, Милано, Њујорк и Чикаго.

Ова не е обична салата што ја правите само за да има нешто ладно на масата. Ова е лесно, елегантно и освежително јадење што одлично одговара за жешки денови, летен ручек, вечера на тераса или како прилог со чаша ладно вино.

Летен вкус со мирис на луксуз

Инспирацијата доаѓа од атмосферата на Хемптонс, познатото летувалиште на источниот брег на САД, кое со години се поврзува со елегантниот и опуштен стил на Ралф Лорен. Токму таа комбинација од едноставност, свежина и дискретен луксуз се чувствува и во оваа салата.

Рецептот се поврзува со Рики Лорен и книгата „The Hamptons: Food, Family, and History“, во која се собрани семејни приказни, фотографии и рецепти инспирирани од американската летна кујна. Денес оваа салата се наоѓа и на менијата на рестораните Ralph’s во Париз, Polo Bar во Њујорк, RL Restaurant во Чикаго и Ralph’s Bar во Милано.

Состојки за салата од лубеница и фета

Лубеница без семки, исечена на коцки	600 г
Фета сирење, исечено на коцки	100 г
Благи црвени пиперчиња, исечени на тенки кругови	2 г
Излупена краставица, исечена на тенки кругови	52 г
Црвен кромид, ситно сечкан	16 г
Чери домати, преполовени	85 г
Рукола	15 г
Свежо нане	5 г
Свеж мини босилек	5 г
Сол и свежо мелен бибер	по вкус

Состојки за прелив

Шери оцет	100 мл
Маслиново масло	2 и пол чаши

Подготовка

Во поголем сад измешајте го шери оцетот со маслиновото масло. Матете додека не добиете изедначен прелив што ќе ги поврзе сите свежи состојки.

Лубеницата ставете ја во голем сад и прелијте ја со мала количина од подготвениот прелив. Нежно промешајте, без да ги изгмечите коцките, затоа што лубеницата треба да остане сочна и цврста.

Во посебен сад измешајте ги краставицата, црвениот кромид, руколата и чери доматите со остатокот од преливот. Мешајте внимателно, колку зеленчукот да добие сјај и вкус.

На чинија за сервирање распоредете ја лубеницата, а околу неа додадете го зачинетиот зеленчук. Потоа ставете ги коцките фета сирење, листовите нане, мини босилекот и тенките кругови од благото црвено пиперче.

На крај додадете уште неколку капки шери оцет, посолете по вкус и наросете свежо мелен бибер. Салатата послужете ја веднаш, добро разладена, додека лубеницата е сочна, сирењето кремасто, а билките свежи.