„Супорт Кочани“ ги подели парите: 137 лица добија по 71.900 денари

Граѓанската иницијатива „Супорт Кочани“ соопшти дека е извршена втора распределба од средствата од заедничката сметка за донации, која изнесуваше вкупно 10.944.793 денари.

Во објавената видео-информација на фејсбук-профилот на иницијативата, се наведува дека од вкупната сума, еден милион денари се издвоени за данок на државата. Останатите средства се еднакво распределени на 137 лица, при што секое лице добило износ од по 71.900 денари.

Пари собрани од хумани граѓани и компании

„Почитувани, транспарентно ја споделуваме информацијата за втората распределба… кои беа собрани по трагедијата што нè погоди“, стои во објавата. Средствата потекнуваат од компании, здруженија, групни акции и хуманитарни настани организирани во земјата и во странство.

Донациите беа собрани по трагедијата во дискотеката „Пулс“ што се случи на 16 март оваа година, во која загинаа 63 лица, а над двесте беа повредени.