Тајната што ја криеја со децении, Лајка умрела во агонија само неколку часа по лансирањето

На денешен ден, пред 68 години, на 3 ноември 1957 година, првото живо суштество било испратено во вселената.

Тоа била Лајка, тригодишно улично куче. „Деветте кругови околу Земјата ја направиле Лајка првиот астронаут во светот кој бил жртвуван за следните мисии во вселената да бидат успешни“, рекол рускиот биолог Алилија Котовскаја, која е горда на својата работа како тренер на Лајка.

Пред Лајка, имало неколку обиди со други кучиња кои летале само по неколку минути. Сепак, Лајка била првото куче кое всушност било испратено во вселената.

Зошто избрале женско улично куче?

За да се прилагодат кучињата на капсулата под притисок, долга само 80 сантиметри, Котовскаја ги дресирала така што ги преместувала во сè помали кафези. Од сите кандидати, Лајка, тригодишна мешана раса од московските улици, најдобро ги поминала тестовите.

„Ги избравме женките бидејќи не мора да ја креваат ногата при мокрење и со тоа зафаќаат помалку простор. Ги избравме скитниците бидејќи се поснаодливи и немаат многу барања“, вели Котовскаја, додавајќи дека кучињата морале да бидат и фотогенични за пропаганда.

„Ја замолив да ни прости и плачев“

Вечерта пред мисијата, сите членови на тимот дошле да се збогуваат со Лајка. „Знаевме дека ќе умре за време на летот, во тоа време немаше начин да ја вратиме. Отидов да ја посетам, ја замолив да ни прости и плачев додека ја галев за последен пат“, вели Котовскаја.

Повеќе од само смрт – тајната што се криеше со децении

Сателитот Спутник бил лансиран во 5:30 часот по московско време. „Во текот на летот, срцето на Лајка многу забрза, и само по три часа се врати во нормала. А потоа одеднаш, за време на деветтиот круг околу Земјата, температурата во капсулата почна нагло да скока и достигна 40 степени Целзиусови, поради недоволна изолација од сончевите зраци.“

Иако имало надеж дека Лајка ќе остане жива најмалку 10 дена, таа починала од топлотен удар и дехидрација само неколку часа по лансирањето.

И покрај ова, советското радио продолжило да известува за „добрата здравствена состојба“ на Лајка, која стана глобална хероина. Според официјалната верзија што Москва ја држела со децении, Лајка починала од отров ставен во нејзината храна за да не изгори кога капсулата повторно ќе влезе во атмосферата. Вистината за нејзината смрт од прегревање беше откриена многу подоцна.