Трамп со нова закана: 10% царина за секоја земја што ја поддржува политиката на БРИКС

Соединетите Американски Држави од понеделник ќе испраќаат писма до своите трговски партнери за нови договори и царини.

Ова во неделата го најави американскиот претседател Доналд Трамп. Тој во април постави основни царини од 10% на увозот. Потоа следуваше и бран на повисоки, таканаречени реципрочни царини. Тој потоа ги паузираше овие царини на 90 дена, а тој рок истекува на 9 јули.

Закана за сојузниците на БРИКС

Писмата за царините или договорите ќе бидат доставени до „различни земји низ светот“, напиша Трамп на својата социјална мрежа. Тој додаде и нова, конкретна закана. Дополнителни 10% царина ќе бидат наплатени на „секоја земја што се согласува со анти-американската политика на БРИКС“.

„Нема да има исклучоци од оваа политика. Ви благодарам на вниманието посветено на ова прашање!“ напиша тој. БРИКС ги вклучува Бразил, Русија, Индија, Кина, Јужна Африка, а од неодамна и Иран, Египет, Етиопија, Саудиска Арабија, ОАЕ и Индонезија.

Рокот е 9 јули, царините стапуваат на сила на 1 август

Претходно во неделата, Трамп изјави дека верува оти САД „до 9 јули ќе завршат со повеќето земји, било со писмо или со договор“. Сепак, неговиот министер за трговија, Хауард Лутник, појасни дека новите царини ќе стапат на сила од 1 август.

„Царините стапуваат на сила на 1 август, но претседателот токму сега ги одредува стапките и договорите,“ рече тој. Еден од почетните цели на царинскиот пакет на Трамп беше да ги принуди другите земји да ги намалат трговските бариери за увозот од САД.