Хорор во Тексас: Христијанскиот камп претворен во хорор приказна, поплавите однесоа 24 животи, се трага по 23 девојчиња

Државните власти соопштија дека од 23 до 25 девојчиња од кампот Мистик сè уште се водат како исчезнати.

Родителите во паника поставуваат фотографии од своите ќерки на социјалните мрежи. Тие молат за било каква информација, откако големи поплави го зафатија јужниот и централниот дел на оваа американска сојузна држава.

Реката надошла 8 метри за само 45 минути

Најмалку 24 лица загинале, а многу се водат како исчезнати. Ова се случило откако олуја пред зори во петокот донела речиси 30 сантиметри дожд. Тоа предизвикало излевање на реката Гвадалупе. Овој регион, познат како „Hill Country“, е подложен на поплави и е полн со летни кампови.

Иако метеоролозите предвидувале 7 до 15 см дожд, паднале дури 25 см. Реката Гвадалупе надошла до 8 метри височина за само 45 минути. Таа целосно ги потопила мерните станици и кампот.

Сведоштво од кампот: „Кабините се збришани, не знаеме каде се девојчињата“

13-годишната Елинор Лестер раскажа дека била евакуирана со хеликоптер. Неа ја разбудил силен гром околу 1:30 часот наутро. Нејзината кабина била на повисоко место. Кабините на помладите девојчиња биле до самата река и први биле поплавени.

Девојчињата од ниските кабини побарале засолниште на ридот. До утрото, немало ни храна, ни струја, ни вода за пиење. „Кампот е целосно уништен. Беше страшно,“ рече таа. „Сите кои лично ги познавам се пронајдени, но има девојчиња за кои знаеме дека се исчезнати.“

Очајни семејства и голема потрага

Државните власти соопштија дека досега се спасени 237 лица. „Ги повикувам граѓаните на Тексас сериозно да се помолат. На колена, искрено, да ги пронајдеме овие девојчиња,“ рече заменик-гувернерот Ден Патрик. Во една локална школа е направен центар за собирање на семејствата.

Десетици семејства споделиле дека примиле повици. Надлежните им јавиле дека нивните ќерки сè уште не се пронајдени. Историски, во 1987 година, поплави проголтале автобус со тинејџери од друг камп. Тогаш се удавиле 10 кампери.