Хорор на одморот: Tатко и син починаа по 100 убоди од „стршлени убијци“

Даниел Овен (47) и неговиот 15-годишен син Купер починаа на 15 октомври откако беа нападнати од рој, за кои се верува дека се азиски џиновски стршлени, додека се возеа на зиплајн во еко-авантуристичко одморалиште во Лаос, објави „Дејли Меил“.

Стршлените ги нападнале туристите и нивниот водич додека се обидувале да се спуштат од дрвена платформа. Според извор близок до американските дипломати, таткото и синот наводно биле свесни кога пристигнале во болницата и не покажувале знаци на анафилактичен шок, но за жал починале неколку часа подоцна.

„Никогаш не сум видел нешто толку сериозно“

Докторот кој ги примил во клиниката изјавил дека биле во ужасна состојба. „Целите нивни тела беа покриени со црвени точки. Беше многу, многу болно. Имаше многу каснувања, повеќе од сто, по целото тело“, рекол доктор Фаномсаџ Факан.

Повеќе од само туристи – сакани во заедницата

Двајцата уживале во еднодневна екскурзија во шумата во близина на градот Луанг Прабанг. Овен, по потекло од Ајдахо, живеел во странство речиси две децении и работел како директор на меѓународното училиште „Quality Schools International“ (QSI) во Хајфонг, Виетнам, каде што учел и неговиот син.

„Длабоко сме тажни поради ненадејната смрт… Ден посвети 18 години на QSI… Тој беше длабоко сакан во нашата заедница и длабоко ќе ни недостига“, соопштиле од училиштето.

Опасноста од „Стршлените убијци“

Азискиот џиновски стршлен, кој може да биде долг и до пет сантиметри, е способен за исклучително болен убод кој може да биде фатален, дури и за луѓе кои не се алергични, доколку се работи за повеќекратни убоди. Тие се одговорни за десетици смртни случаи секоја година, а некои истражувачи ги нарекуваат „стршлени убијци“.