Црниот биланс во Тексас расте: Бројот на загинати во поплавите се искачи на 104, меѓу нив најмалку 28 деца

Бројот на загинати во катастрофалните поројни поплави во Тексас достигна 104 лица, додека голем број на луѓе сè уште се водат како исчезнати.

Ова е последниот, трагичен биланс од поплавите. До денеска е потврдено дека најмалку 59 луѓе во округот Кер и на осум други места во централен Тексас го загубиле животот. Ова е една од најголемите природни катастрофи во поновата историја на регионот.

Трагедија во кампот „Мистик“: Загинати најмалку 27 девојчиња и вработени

Во округот Кер, 38 од загинатите се возрасни, а 21 се деца. Од нив, 16 девојчиња се пронајдени во кампот Мистик, христијански летен камп покрај реката. Според други извори, вкупниот број на загинати во кампот, вклучувајќи и вработени, е најмалку 27. Уште единаесет девојчиња од истиот камп сè уште се водат како исчезнати.

Потрагата по исчезнатите продолжува, властите на удар на критики

Разорувањата долж реката Гвадалупе предизвикаа огромна и масовна потрага. Властите се соочуваат со тешки прашања околу нивната подготвеност. Поројните поплави започнаа со силна олуја кога повеќе од 30 сантиметри дожд паднаа за многу кратко време. Ова предизвика реката да надојде за неверојатни осум метри за само 45 минути.

Властите се на удар на критики. Причината е што жителите и летните кампови долж реката не биле навремено предупредени. И не им било кажано да се евакуираат. Властите од округот Кер се правдаат дека претходно предложиле посилен систем за предупредување, но дека на граѓаните тогаш им бил прескап.