40% од административците не работат, нема веќе плата за неработење

Министерот за јавна администрација, Горан Минчев, денеска ги презентираше клучните резултати и реформски потези.

Тие, според него, ја поставиле основата на новата култура на управување во јавниот сектор. Тој нагласи дека јавната администрација повеќе не смее да биде „заштитена зона за привилегирани поединци“, туку вистински сервис на граѓаните.

Крај за партиските вработувања и корекција на Балансерот

„Формирањето на Министерството за јавна администрација не беше бирократски потег. Тоа беше политичка порака,“ изјави Минчев. „Порака дека веќе нема место за партиски вработувања и за нефункционални институции.“

Од клучните преземени мерки, тој ја издвои корекцијата на Балансерот. Ова е методологијата за пресметка на етничката застапеност. „Пресметката ја усогласивме врз база на реалната резидентна популација, а не како до сега,“ објасни Минчев.

Алармантна статистика: 40% од администрацијата не работи ништо

Тој притоа соопшти дека дури 40 проценти од административците не работат. Или бараат начин како да не дојдат на работа. „Тоа е горе-долу исто во сите институции,“ рече тој. Според него, има една група од 25-30% која го носи целиот товар.

Втората група е вклучена, но не го дава максимумот. Третата група од 40% е резултат на партиски и роднински вработувања. „Овие кои што не работат сакаме да ги вратиме во процесот.“ „Што значи, нема веќе плата ако не работиш,“ порача Минчев.

Проблемот со ниските плати и недостигот на кадар

Прашан за оптимизација на бројот на вработени, Минчев одговори нешто друго. Тој рече дека поради висината на платата, интересот за работа е сè помал. „Платите се несоодветни и мали, па нема интерес за вработување на млади.“

„Просекот на возраст во администрацијата е голем. Се соочуваме со недостиг на кадар,“ рече тој. „Ќе дојдеме во ситуација во наредните 5 до 10 години да нема кој да работи.“