Аларм од Антарктикот: Откриено неконтролирано истекување на моќен стакленички гас

Алармантно откритие на научниците под Антарктикот: „Неконтролирано е, ова може да стане епицентар на опасност“

Во едно од најзагрижувачките откритија поврзани со климатските промени досега, научниците открија дека од дното на океанот околу Антарктикот неконтролирано истекува метан, исклучително моќен стакленички гас. Нови извори се појавуваат со „запрепастувачка брзина“, што предизвикува страв дека нашите прогнози за идното глобално затоплување можеби се сериозно потценети. Оваа тивка, подводна закана може да го претвори најстудениот континент во нов, неочекуван епицентар на климатската криза.

Длабоко под морското дно, во седиментите се заробени огромни резерви на метан. Понекогаш, овој гас наоѓа пат до површината преку пукнатини, создавајќи меурчиња што се издигаат кон атмосферата. Научниците се особено загрижени за метанот бидејќи во првите 20 години, тој е околу 80 пати помоќен во задржувањето на топлината од јаглерод диоксидот.

Досега, се веруваше дека ваквите истекувања на Антарктикот се исклучително ретки – до неодамна беше познат само еден активен извор. Но, кога меѓународен тим на научници почнал да го истражува Росовото Море со помош на сонари и роботски подморници, резултатите ги шокирале. Тие откриле повеќе од 40 нови, активни извори на метан на места кои претходно биле детално истражени, што значи дека се работи за нов феномен.

„Нешто што се сметаше за ретко, сега станува вообичаено“, изјави за Си-Ен-Ен, морскиот биолог Сара Сибрук.

Зошто сега? Одговорот е во климатските промени

Иако точната причина сè уште се истражува, експертите се сомневаат дека виновникот е глобалното затоплување. На Арктикот, на спротивниот крај на светот, веќе е докажано дека топењето на мразот и затоплувањето на океаните предизвикуваат масовно ослободување на метан. Сега, се чини дека истиот опасен маѓепсан круг започнува и на Антарктикот: затоплувањето предизвикува истекување на метан, а метанот дополнително го забрзува затоплувањето.

Повеќе од само меурчиња – темпирана бомба за климата

Она што е најзагрижувачко е што овие новооткриени извори на метан воопшто не се вклучени во постоечките климатски модели. Ова значи дека нашите предвидувања за идното затоплување можеби се премногу оптимистички, бидејќи не го земаат предвид овој нов, моќен извор на стакленички гасови.

„Антарктикот крие огромни резерви на метан. Ако планетата продолжи да се загрева, ова подрачје би можело да се претвори од природна лабораторија во епицентар на опасност“, предупредува професорот Ендру Тарбер.

Тој ги споредува овие извори со опасно животно: „Фасцинантни се за проучување, но мора да се третираат со голема претпазливост, бидејќи можат да станат исклучително деструктивни ако ги потцениме“.

Научниците веќе следната недела се враќаат на Антарктикот за двомесечна експедиција, во трка со времето да ја разберат оваа нова закана, пред таа да стане неповратна.