Зошто сè уште немаме лет до Лондон? Конечно е откриена вистината за преговорите со Рајанер

Конечно ќе летаме директно за Лондон? Потпишан е клучниот договор со Велика Британија, но зад него се крие приказна за неуспешните преговори со Рајанер

Македонија и Велика Британија потпишаа нов Меѓудржавен договор за авиосообраќај, потег што конечно ја отвора вратата за воспоставување на толку посакуваните директни летови меѓу Скопје и Лондон. Иако веста беше прославена како голем чекор напред, таа доаѓа само неколку месеци по неуспешниот обид на владата да го донесе гигантот „Рајанер“, кој според министерот Николоски, барал услови што би значеле „банкрот за државата“.

Договорот, кој го потпишаа министерот за транспорт Александар Николоски и неговиот британски колега Киер Метер, создава нова правна рамка која треба да ги олесни процедурите и да ги направи македонските аеродроми поатрактивни за британските авиокомпании. „Ова овозможува подобри конекции, нови дестинации и конкурентни цени“, изјави Николоски од Лондон, додавајќи дека очекува зголемен број на британски туристи.

Сепак, патот до директни летови со Лондон е поплочен со неуспеси. Легендарниот „Бритиш Ервејс“ во два наврати, во 1999 и 2009 година, се обиде да воспостави линија, но и двата пати брзо се повлече поради неисплатливост. Поголема надеж се појави годинава со преговорите со најголемиот европски нискобуџетен превозник, „Рајанер“.

Тие преговори, сепак, завршиле неславно. Министерот Николоски неодамна откри зошто понудата на Ирците била одбиена. Според него, барањата на „Рајанер“ биле екстремни. „Тие сакаат аеродромите во Скопје и во Охрид да бидат опслужувани исклучиво од ‘Рајанер’“, изјави Николоски, додавајќи дека барале субвенции од 20 евра по патник во Скопје и 25 во Охрид, што би ја банкротирало државата. Покрај тоа, тие инсистирале на невозможен „turnaround“ (време помеѓу слетување и полетување) од само 35 минути, што би барало ангажирање на стотици нови работници на аеродромите само за нив.

Сега, кога „Рајанер“ е надвор од игра, топката е кај операторот „ТАВ Македонија“. Генералниот директор Неџат Курт потврди дека токму Велика Британија и Шпанија се нивниот главен фокус во наредниот период. Потпишувањето на новиот меѓудржавен договор е првиот чекор. Сега останува „ТАВ“ да најде авиокомпанија – веројатно „Виз Ер“ или „ИзиЏет“ – која ќе биде подготвена да лета за Лондон под услови кои се одржливи и за компанијата и за државата. Дотогаш, македонските граѓани ќе продолжат да патуваат за Лондон со прекачување преку Виена, Цирих или Белград.