Езерото Ван се повлече, а од дното „изникна“ пристаниште старо 100 години

Екстремната суша доведе до повлекување на нивото на водата во најголемото турско езеро Ван, кое се наоѓа на крајниот исток на земјата.

Оваа локација е отсекогаш позната по остатоците од населби потопени во древни времиња, а сега, поради климатските промени, езерото откри сосема поинаква тајна.

Мистериите излегуваат на виделина

При повлекувањето на водата се појавиле дрвени столбови, всушност остатоци од конструкција на старо пристаниште и скеле, пренесува „Милиет“. „Повлекувањето на водата откри дрвени столбови, постари од 100 години. Езерото Ван крие многу тајни и додека водата се повлекува, мистериите полека излегуваат на виделина“, рекол професорот Мустафа Акус.

Повеќе од само суша – сведоштво од 87-годишник

Професорот Акус објаснил дека езерото Ван е затворен басен (без истек) и дека поради намалените врнежи од снег и зголеменото испарување, нивото драстично опаѓа.

87-годишниот жител Мевлут Билиџи ја потврдил приказната, велејќи дека неговото семејство го користело тоа пристаниште за транспорт пред да биде потопено од надојденото езеро. „Со повлекувањето на водата, столбовите повторно се појавија“, рекол тој. Овој феномен, истакнуваат експертите, дава уникатна можност за проучување на историјата на езерото и последиците од климатските промени.