„Јон Вардар“ ја освои Индија: Награда од детското жири во Њу Делхи

Првиот македонски долгометражен анимиран филм „Јон Вардар против галаксијата“ освои значајно признание во Индија.

Филмот ја доби наградата „Сребрен Чин“ доделена од детското жири на 19-тото издание на „CHINH India Kids Film Festival & Forum“ во Њу Делхи. Ова е особено важно бидејќи на овој фестивал децата сами ги гледаат, дискутираат и гласаат за победниците, што ја прави наградата уште позначајна.

Филмот влегува во училиштата во Индија

Фестивалот CHINH е водечка азиска платформа, а наградените филмови влегуваат во широка образовна мрежа од библиотеки и училишта, што отвора можности за прикажување низ цела Индија.

„Ова признание ни е особено драго затоа што доаѓа директно од публиката за која филмот е создаден“, изјави режисерот Гоце Цветановски по добивањето на наградата.