Орбан пресече: „Дури и да ни ја нудат, не сакаме дел од Украина!“

Унгарија би се откажала од можноста да го припои Закарпатје (Западна Украина) на својата територија, дури и ако добие таква понуда, изјави унгарскиот премиер Виктор Орбан.

Во интервју за медиумската група „Аксел Шпрингер“, Орбан беше дециден дека промената на границите не е опција. „Вие, Германците, веќе се обидувавте со други територии, а на крајот ние страдавме. Така што, искуството покажува дека не вреди да се впуштаме во таа авантура“, истакна унгарскиот премиер.

Тензиите за малцинствата остануваат

Иако Орбан ги отфрли територијалните претензии, Будимпешта и понатаму го обвинува Киев за кршење на правата на унгарското малцинство во Закарпатската област, особено во делот на употребата на мајчиниот јазик и образованието. Владата на Унгарија предупреди дека нема да дозволи пристапување на Украина во ЕУ се додека овие прашања не бидат решени.

Министерот за надворешни работи, Петер Сијарто, претходно нагласи дека „Киев веќе десет години ја измамува Будимпешта“ и дека Унгарија нема да поддржи никакво движење на Украина кон ЕУ без враќање на правата на Унгарците.