Русија со ултиматум до „Мета“: Или почитувајте ги нашите закони или „Воцап“ заминува во историјата!

Државниот регулатор за комуникации на Русија, Роскомнадзор, издаде ултиматум: „Воцап“ (WhatsApp) ќе биде целосно блокиран доколку не започне да ги почитува руските закони.

Регулаторот ја обвини платформата, која е во сопственост на „Мета“, дека ги игнорира руските барања дизајнирани за борба против криминалот и тероризмот. „Доколку услугата за пораки продолжи да не ги исполнува барањата на руското законодавство, таа ќе биде целосно блокирана“, предупреди Роскомнадзор преку агенцијата Интерфакс.

Судир околу приватноста и државната апликација „MAX“

Ова е ескалација на спорот започнат во август, кога Русија ги ограничи повиците на „Воцап“ и „Телеграм“ поради одбивањето на платформите да споделуваат информации со безбедносните служби. Додека „Воцап“ ја обвинува Москва дека сака да ги отсече граѓаните од безбедна комуникација, руските власти промовираат државна апликација наречена „MAX“. Критичарите предупредуваат дека „MAX“ може да служи за масовно следење на корисниците, иако државните медиуми го негираат тоа.