Дали грешиме што го пиеме кафето „на гладно“? Еве што велат експертите

Мит или вистина: Дали првото утринско кафе е опасно за желудникот?

За милиони луѓе, денот не започнува без мирисот на кафе, често испиено „на екс“ пред појадокот. Но, дали оваа навика е штетна? Според порталот EatingWell, за повеќето здрави луѓе, кафето на празен стомак не претставува сериозен ризик. Дури и се наведува дека умереното консумирање (3 до 5 шолји дневно) носи одредени здравствени придобивки.

Кој треба да внимава?

Сепак, кафето е силен стимуланс кој го зголемува лачењето на желудочна киселина и го забрзува варењето. Ако имате чувствителен стомак, склоност кон горушица или ГЕРБ, оваа навика може да ви предизвика непријатност. Експертите имаат едноставен совет: Слушајте го телото. Ако почувствувате мачнина, едноставно испијте го кафето по појадокот или искомбинирајте го со малку храна.