Три знаци дека тавата е за фрлање: Еден од нив многумина го игнорираат со години

Тавите и тенџерињата често ги користиме многу подолго отколку што треба. Се навикнуваме како се загреваат, како ја печат храната и ретко се прашуваме дали сè уште се безбедни за готвење.

Сепак, не секое оштетување е само естетски проблем. Некои дамки не се причина за паника, но други промени можат да влијаат врз квалитетот на храната, рамномерното печење, па дури и врз безбедноста при подготовка.

Дамките не секогаш значат проблем

Темни траги, остатоци од загорена храна или површинска рѓа не мора веднаш да значат дека тавата е за фрлање. Често се појавуваат од вода, каменец, остатоци од храна или долготрајна употреба.

Ако дамките лесно се отстрануваат со соодветно чистење и не ја менуваат самата површина на материјалот, тавата може и понатаму да се користи. Проблемот почнува кога оштетувањето е длабоко, постојано и не исчезнува.

Искривено дно значи нерамномерно готвење

Еден од знаците дека тавата си го одработила своето е искривено дно. Најлесно ќе го проверите тоа ако ја ставите на рамна површина. Ако се ниша или не легнува рамномерно, дното најверојатно е деформирано.

Ова често се случува кога врела тава веднаш се става под млаз ладна вода. Наглата промена на температурата го шири и собира металот, па со време дното се извиткува.

Таквата тава не мора веднаш да биде опасна, но го отежнува готвењето. Маслото се собира на една страна, храната се пече нерамномерно, а јајцата, палачинките или месото можат да загорат на едно место, додека на друго да останат недопечени.

Оштетен нелеплив премаз е најважниот знак

Најсериозното предупредување е лупење, пукање или поголеми гребнатини на нелепливиот премаз. Ако забележите дека слојот се одвојува, се рони или се гледа металот под него, време е тавата да се замени.

Кога заштитниот слој еднаш ќе се оштети, нема вистински начин да се врати во првобитна состојба. Освен што храната почнува да се лепи, мали честички од премазот можат да завршат во јадењето.

Кога тавата навистина е за фрлање

Тавата треба да ја замените ако нелепливиот премаз се лупи, ако дното е толку искривено што храната постојано се пече нерамномерно или ако рѓата не е само површинска, туку навлегла во самиот материјал.

Во овие случаи поправката најчесто нема смисла. Продолжувањето со користење само ќе донесе полошо готвење, повеќе лепење, повеќе загорување и поголема нервоза во кујната.

Како да ѝ го продолжите животот

За тавата да трае подолго, не ја мијте додека е врела, не користете метални прибори врз нелеплив премаз и избегнувајте груби сунѓери или абразивни средства. Дрвени, силиконски или пластични кујнски алатки се многу побезбедни за заштитниот слој.

Ако тавата е целосно дотраена, проверете дали може да се однесе како метален отпад. Ако е сочувана, но повеќе не ви треба, може да ја подарите некому кому ќе му послужи. Но кога има длабоки оштетувања, лупење или сериозна рѓа, најдобрата одлука е јасна: време е за нова тава.