Храната ви се лепи за тавата? Престанете да ги правите овие грешки

Подготвувате ручек, внимателно го следите рецептот, а потоа храната се залепува за дното. Наместо совршено испечен оброк, добивате искинати парчиња, загорени делови и тава што подоцна тешко се чисти.

Многумина веднаш го обвинуваат квалитетот на садот. Сепак, професионалните готвачи велат дека проблемот најчесто се крие во начинот на кој ја контролираме температурата и ја движиме храната.

Кулинарскиот експерт Џастин Чапл ги издвојува трите најчести грешки поради кои намирниците се лепат за тавата.

Ја превртувате храната прерано

Една од најчестите грешки е постојаното подигнување, проверување и поместување на храната додека се пече. Месото се допира со виљушка или шпатула на секои неколку секунди, од страв дека ќе загори.

Но токму тоа може да предизвика лепење и распаѓање. Кога едната страна доволно ќе се испече и ќе се создаде коричка, храната најчесто сама се одвојува од површината.

Доколку чувствувате отпор при обидот да ја превртите, оставете ја уште малку. Наместо сила, потребни се само неколку дополнителни моменти трпение.

Тавата не е доволно загреана

Ставањето на намирниците во студена или недоволно загреана тава е уште една причина за лепење. Површината треба рамномерно да се загрее пред да започне пржењето.

Кога храната ќе дојде во контакт со соодветно загреана површина, побрзо се создава коричка и значително се намалува можноста да остане залепена на дното.

Сепак, тавата не треба ниту да биде прегреана. Доколку маслото почне да чади, температурата е превисока и ринглата треба веднаш да се намали.

Најдобар знак е кога маслото лесно светка и рамномерно се движи низ тавата, без да гори или да создава чад.

Готвите на најсилна температура

Силната температура не значи секогаш и побрзо готвење. Напротив, надворешниот дел од храната може брзо да загори, додека внатрешноста останува недоволно зготвена.

Ова е особено проблематично кај месото, како пилешкото, каде што површината може да потемни многу пред средината да биде целосно подготвена.

Постојаното готвење на екстремно висока температура може да го оштети и заштитниот слој на тавите, особено кај моделите со нелеплива површина.

Малку трпение прави голема разлика

Наместо најсилна рингла и постојано превртување, тавата загревајте ја постепено, користете соодветна количина масло и оставете ги намирниците да се испечат пред да ги поместите.

Подготовката можеби ќе трае неколку минути подолго, но храната ќе биде порамномерно испечена, повкусна и без парчиња залепени на дното.