Стариот паркет се раздвојува? Четири трикови што спасуваат цел под

Дрвениот под му дава посебна топлина на домот, но со текот на времето меѓу паркетните штици може да се појават непријатни празнини. Во нив се собира прашина, нечистотија, а понекогаш можат да се забележат и ситни инсекти.

Многумина веднаш помислуваат дека целиот паркет мора да се извади, иструга и повторно да се лакира. Сепак, празнините не секогаш значат дека подот е за целосна замена.

Во зависност од начинот на поставување и големината на оштетувањето, постојат неколку начини со кои паркетот може да се среди без голема прашина, скапи мајстори и сериозни трошоци.

Зошто се создаваат празнини меѓу штиците?

Дрвото е природен материјал кој реагира на температурата и влажноста во просторијата. Кога воздухот е топол и влажен, штиците впиваат влага и се шират, а во суви и студени услови повторно се собираат.

Овие постојани промени со текот на времето можат да предизвикаат раздвојување, виткање или подигнување на паркетот. Проблемот може да биде уште поголем доколку подлогата не е добро заштитена од влагата што доаѓа од темелите.

При поставувањето на паркетот треба да се остави простор од околу 10 до 15 милиметри меѓу подот и ѕидот. Тој простор им овозможува на штиците слободно да се шират без да се туркаат и оштетуваат.

Со едноставна проверка откријте дали паркетот има простор

Празнината покрај ѕидот не се забележува бидејќи ја покриваат подните лајсни. Токму под една од нив можете да проверите дали паркетот бил правилно поставен.

Извадете една лајсна и погледнете дали меѓу првата штица и ѕидот има слободен простор. Ако паркетот е целосно притиснат до ѕидот, штиците при ширењето немале каде да се движат, па можеле да се раздвојат или да се деформираат на друго место.

Ова правило важи и за масивниот и за повеќеслојниот паркет. Иако повеќеслојните модели подобро ги поднесуваат промените на влажноста, и ним им е потребен простор покрај ѕидовите.

Празнините можат да се појават и поради брзо или невнимателно поставување. Доколку штиците не биле цврсто споени една со друга, со текот на времето можат дополнително да се раздалечат.

Четири начини за пополнување на празнините

1. Вратете ги подвижните штици на нивното место

Ако паркетот не е залепен или закован за подлогата, штиците може внимателно да се поместат. Почнете од работ на просторијата и постепено приближувајте ги една кон друга додека празнината не се затвори.

На краевите може да се постават мали дрвени клинови за штиците повторно да не се раздвојат. Кај ваков под треба да се избегнува влечење тежок мебел, бидејќи неговото поместување може повторно да отвори празнини.

2. Направете смеса од пилевина и проѕирна смола

За помалите пукнатини може да се употреби ситна пилевина или дрвена прашина во боја слична на паркетот. Таа се меша со проѕирна смола додека не се добие густа паста.

Смесата внимателно се нанесува во празнините со шпатула. За подобар изглед, важно е бојата на пилевината што повеќе да одговара на нијансата на подот.

3. Поставете тенки дрвени летвички

Поголемите и подлабоки празнини може да се затворат со тенки летвички направени од ист или сличен вид дрво. Летвичките се приспособуваат на ширината на отворот и внимателно се втиснуваат меѓу штиците.

Откако ќе бидат поставени, испакнатите делови може лесно да се израмнат со шмиргла за поправеното место да се вклопи со остатокот од паркетот.

4. Употребете акрилен кит во соодветна боја

Во продавниците се достапни готови акрилни маси во различни нијанси на дрво. Треба да се избере боја што најмногу се совпаѓа со паркетот и производот да се нанесе според упатството на пакувањето.

Овој метод е практичен за помали и средни празнини, особено кога е потребно брзо решение без поместување или вадење на штиците.