СКАНДАЛ ВО РИМ: Туристка ја претвори Фонтаната ди Треви во базен!

Видеото од овој невообичаен инцидент за кратко време стана вирално на социјалните мрежи. На снимката јасно се гледа како жената, облечена во црвен топ и шорцеви, без двоумење влегува во водата и слободно плива низ еден од најпознатите историски споменици во Италија.

Брза реакција на обезбедувањето

Околу фонтаната за само неколку мигови се собраа бројни минувачи кои во чудо следеа што се случува. Сепак, нејзината „авантура“ не траеше долго.

Припадниците на обезбедувањето брзо реагираа, ѝ пријдоа на фонтаната и ѝ наредија веднаш да излезе од водата.

Откако излезе, таа веднаш беше спроведена до комуналната полиција. Мажот кој беше во нејзино друштво безуспешно се обидуваше да ја смири ситуацијата, нервозно гестикулирајќи кон надлежните служби.

Строги казни за прекршителите

Според наводите на италијанските медиуми, туристката ќе се соочи со парична казна во износ од 500 евра поради неовластено влегување во фонтаната. Овој закон строго се применува со цел да се заштити непроценливото културно наследство на Рим.

Овој инцидент дополнително привлече внимание во јавноста бидејќи се случи само неколку дена откако и еден турист од Нов Зеланд заработи идентична казна поради истиот прекршок на истата локација.