МЕТАЛ ОД ВСЕЛЕНАТА: Античките елити на Медитеранот носеле прстени од метеорити!

Пред повеќе илјади години, метеоритите биле исклучително скапоцени, како симболично, така и како многу ценет извор на железо за општествата пред почетокот на железното време. Меѓу нив биле и легендарните предгрчки култури, како Минојците и Микенците, кои носеле впечатливи прстени направени од вонземски метал за да ги истакнат својата позиција и моќ во општеството.

Луѓето низ историјата ширум светот користеле метеорити за изработка на алати, оружје и накит, од Гренланд до Египет, каде славниот „вселенски бодеж“ на Тутанкамон сè уште ја фасцинира јавноста.

Анализа на над 100 антички артефакти

За да утврдат дали Минојците и Микенците користеле метеоритско железо, истражувачите спровеле петгодишна студија анализирајќи го хемискиот состав на повеќе од 100 артефакти од просторот на денешна Грција. Фокусот бил ставен на 91 железен предмет (главно прстени, нараквици и ножеви) од бронзеното време, стари помеѓу 3.800 и 3.000 години.

„Со помош на недеструктивна рендгенска флуоресценција, откриено е дека 13 предмети содржат никел и дека најверојатно се направени од метеоритско железо. Сите овие 13 предмети се луксузни прстени кои вклучуваат и други благородни метали, како злато или сребро,“ покажува истражувањето.

Увоз од Египет и минливост на модата

Повеќето од овие прстени потекнуваат од луксузни гробници, како оние во Микена. Фантастичен е податокот дека еден таков прстен е пронајден во минојска некропола, на прстот на покојник кој најверојатно бил висок свештеник.

Се претпоставува дека метеоритското железо не било од локално потекло, туку било увезено од Египет. Грчката географија не е погодна за зачувување на метеоритите (морето ги разградува), за разлика од египетските пустини кои ги чуваат од оксидација и распаѓање.

Помамата за метеоритски прстени траела до околу 1200 година пред новата ера. Истражувачите заклучуваат дека оваа „вселенска мода“, ексклузивна за минојската и микенската елита, природно престанала од наједноставниот човечки стимул – минливоста на модните трендови.