Земјотрес во РТС: Разрешени осум уредници, новиот тим со јавно извинување до гледачите за досегашното известување

Голема смена на уредници и лажна дојава за бомба

Одлуката за масовните разрешувања ја донел Боривоје Ускоковиќ, вршител на должноста главен уредник на Информативната програма на Радио-телевизија Србија (РТС). Соопштувањето на оваа информација се случи во вчерашното вечерно издание на централната информативна емисија „Дневник 2“, чие емитување доцнеше поради дојава за поставена бомба во зградата на телевизијата, за која полицијата подоцна утврди дека била лажна.

Од своите досегашни должности се разрешени петмина уредници на различни сектори: Зоран Станојевиќ, Весна Шиљеговиќ, Николина Ракиќ, Горислав Папиќ и Сузана Гвозденовиќ. Тие раководеа со порталот на РТС, дописничката мрежа, регионалната програма, емисијата „Око“ и програмата наменета за дијаспората. Дополнително, сменети се и клучните фигури на „Дневник 2“ – уредниците Милица Недиќ, Душан Убовиќ и Ружа Јеремиќ Турудиќ.

Izvinjenjce pic.twitter.com/j7OHCKnr9i

— Željko Veljković (@novinarupenziji) October 29, 2026

Нов тим и несекојдневно извинување до јавноста

На испразнетите позиции веќе се именувани нови кадри. Уредувачките функции ги преземаат Радивој Маројевиќ (дописничка мрежа), Милан Срдиќ (регионална редакција), Вања Ратковиќ (редакција на емисијата „Око“), како и Драгана Игњиќ и Бобан Ковачевиќ.

Она што најмногу ја изненади јавноста беше пораката која ја прочита водителот по објавувањето на смените. Новиот уредувачки колегиум на Информативната програма отворено се извини за содржините кои претходно биле игнорирани или изоставени.

„Почитувани гледачи, ова се првите чекори кон – се надеваме – закрепнувањето на РТС, како и првото извинување до сите оние што ги изоставивме во изминатиот период. Сакаме да ја вратиме вашата доверба“, порача новиот уредувачки тим.