Венко Филипче: ‘Нема таен договор, СДСМ им скрати 140.000 гласови на ВМРО-ДПМНЕ’

Венко Филипче дециден: „Нема таен пакт, ние сме виновни што ВМРО-ДПМНЕ изгуби 140.000 гласови“

Претседателот на Социјалдемократскиот сојуз на Македонија, Венко Филипче, денеска остро ги отфрли сите чаршиски муабети и политички шпекулации за наводен „скриен договор“ или пакт за ненапаѓање со владејачката ВМРО-ДПМНЕ. На новинарско прашање, тој не само што негираше каква било тајна соработка, туку истакна дека токму жестоката реторика и теренското делување на неговата партија се главната причина за евидентната ерозија на поддршката кај актуелната власт.

„Во однос на некаков скриен договор со ВМРО-ДПМНЕ или тоа дека ние немаме доволно силна опозициска реторика, сметам дека тоа што ВМРО-ДПМНЕ изгуби 140.000 гласови за година и пол е заслуга во еден дел и на нашата опозициска реторика“, изјави Филипче. Тој посочи дека оваа бројка не е занемарлива, бидејќи претставува губење на дури една третина од гласачкото тело што власта го имала пред само 18 месеци, што според него е директен доказ за ефикасноста на СДСМ.

Разобличување на „лажниот патриотизам“ и скандалите

Лидерот на опозицијата потенцираше дека СДСМ континуирано работи на откривање на вистинското лице на власта. Според Филипче, неговата партија е таа што ги вади на виделина клучните афери кои ја тресат државата, од коруптивни шеми до партизација на безбедносните служби. „Ние сме тие и бевме тие кои што ги разобличуваа нивните лаги, нивната лажна реторика и нивниот лажен патриотизам“, истакна тој.

Тендери, АНБ и најава за уште пожестока офанзива

Филипче наброја конкретни примери каде СДСМ удрил по власта, споменувајќи ги „мрежата на договорени тендери“ за кои обвинителството сè уште молчи, како и серијата скандали во Агенцијата за национална безбедност (АНБ). Тој најави дека овој курс нема да се менува, туку напротив, ќе се интензивира. „Ќе продолжиме така, како силна опозиција уште позасилено да работиме во следниот период“, заклучи Филипче, испраќајќи порака дека СДСМ е подготвен целосно да ја искористи политичката криза на противникот.