Вучиќ вечерва поднесува оставка: Ана Брнабиќ ја презема функцијата в.д. претседател на Србија

Емотивно збогување со кабинетот

Вучиќ веќе приреди коктел за вработените во неговиот кабинет, одбележувајќи го крајот на својот мандат. Преку снимки објавени на неговиот официјален профил на Инстаграм, тој се збогуваше со своите соработници со танц, оро и симболичните песни „А сад адио“ и „Четири години“.

„Ви благодарам што истрајавте и во моментите кога се случуваа работи кои не ви се допаѓаа. Несомнено сум грешел, како што тоа го прави секој нормален човек секој ден. Бескрајно ви благодарам за сè, десет години живот не се мал период“, им порача Вучиќ на присутните.

Оставка во 20 часот и нови избори

Како што претходно најави за време на неговиот престој во Њујорк, оставката ќе биде поднесена вечерва околу 20 часот, кога се очекува детално да им ја образложи својата одлука на граѓаните на Србија.

Со овој чин, мандатот на Вучиќ автоматски престанува. Согласно српскиот Устав и Законот за претседател, шефот на државата го заменува претседателот на Собранието. Во овој случај, Ана Брнабиќ како претседателка на распуштеното собрание ќе ја преземе функцијата вршител на должноста претседател на Србија. Според законските рокови, новите претседателски избори мора да се организираат и одржат најдоцна во рок од три месеци од престанокот на мандатот.