НОВ ПРЕДИЗВИК ЗА СРПСКИОТ ПРЕТСЕДАТЕЛ: Александар Вучиќ станува водител на сопствен подкаст!

Според официјалната најава споделена на неговиот Инстаграм профил, премиерната епизода ќе се емитува овој петок во 12 часот, ексклузивно на неговиот официјален Јутјуб канал. Честа да го отвори овој нов медиумски формат ја доби легендарниот кошаркарски тренер Мирослав Мута Николиќ, со кого Вучиќ во опуштена атмосфера ќе разговара за спортските успеси, предизвиците и лекциите што ги носи животот.

Бегство од политиката во светот на културата и спортот

Објаснувајќи ги мотивите за покренување на овој проект, српскиот претседател истакна дека постојат теми и разговори кои долго време сакал да ги води јавно, но за кои не постоел соодветен простор во рамките на неговите државнички обврски. „Ова нема да биде подкаст за политика, туку за луѓето, за нивните успеси, неуспеси и верувања. Ќе зборуваме за спортот, културата, уметноста, религијата и историјата – за сите оние нешта што нè поврзуваат и од кои можеме да научиме нешто ново,“ напиша Вучиќ, повикувајќи ги граѓаните да се претплатат на каналот и да бидат дел од приказната од самиот почеток.

Изборот на првиот гостин не е случаен. Мирослав Мута Николиќ претставува вистинска институција во српската кошарка. Со богата тренерска кариера која континуирано трае уште од 1990 година, тој ги предводел регионалните гиганти како Црвена Звезда, Партизан и Будуќност, а како помошник-тренер на српската репрезентација има освоено дури четири медали на големите меѓународни натпреварувања.

„Сакам овој ‘подкАВст’ да биде место за добри разговори и интересни луѓе. Простор каде што можеби ќе можеме малку подобро да се запознаеме, вреди да се застане и да се сослуша друга личност.“