Тешка несреќа во Германија: Училишен автобус со 20 деца се заби во ѕид од куќа

Излетал од кружен тек во Бад Олдесло

Инцидентот се случил утринава околу 7:20 часот на улицата Цилцберг во градот Бад Олдесло, лоциран во сојузната покраина Шлезвиг-Холштајн. Според првичните информации, од засега непознати причини, возилото поминало директно преку кружен тек и со голема брзина удрило во ѕидот на блиската куќа.

Во моментот на несреќата, во автобусот се наоѓале околу 20 деца кои патувале кон своите училишта.

Заробен возач и повредени патници

Како што соопшти локалната полиција, од силината на ударот возачот останал заробен во предниот дел од автобусот и морал да биде извлекуван. Покрај него, повредени се една жена и уште неколку патници. Точниот број на повредени деца, како и сериозноста на нивните повреди, сè уште не се официјално потврдени.

„На местото на несреќата веднаш пристигнаа итните медицински служби, пожарникарите и полицијата. Целата област е целосно обезбедена за да се олесни спасувачката акција и да се изврши увид“, информираат германските власти.