„Франкенштајн млеко“ стигнува во маркетите: Се прави во лабораторија, а има ист вкус како кравјото!

Лабораториски создадено млеко кое не доаѓа од крави, туку од клетки од цицачи, наскоро ќе се најде на полиците на маркетите во САД под името „UnReal Milk“.

Овој производ, кој јавноста веќе го нарекува „Франкенштајн млеко“, се произведува од компанијата „Brown Foods“ во големи биореактори. Клетките од животни создаваат исти протеини, масти и јаглени хидрати како кај обичното кравјо млеко. Ко-основачот Сохаил Гупта тврди дека технологијата во иднина би можела да произведува млеко од „секој цицач, дури и човечко“.

„Биотехнолошка глупост“ или спас за планетата?

Производот доби брза дозвола преку GRAS (Генерално признато како безбедно), прескокнувајќи ја долгата процедура на ФДА. Додека научниците го фалат еколошкиот потенцијал (помалку стакленички гасови и потрошувачка на вода), јавноста е скептична. На социјалните мрежи се шират повици за забрана, нарекувајќи го производот „биотехнолошка глупост“ туркана од милијардери. Критичарите предупредуваат на недостаток од долгорочни студии за влијанието врз здравјето.