Албанија незапирлива кон ЕУ: Отворен и последниот Кластер во Брисел!

Албанија и ЕУ денеска во Брисел ја одржуваат седмата Меѓувладина конференција, во чии рамки се отвораат преговорите по последниот, Кластер 5 од пристапниот процес – „Ресурси, земјоделство и кохезија“.

Со Конференцијата претседава данската министерка за европски прашања Мари Бјере. Во рамките на овој кластер спаѓаат следниве поглавја:

• Поглавје 11 – Земјоделство и рурален развој
• Поглавје 12 – Безбедност на храната, ветеринарство и фитосанитарна политика
• Поглавје 13 – Рибарство и аквакултура
• Поглавје 22 – Регионална политика и координација на структурните инструменти
• Поглавје 33 – Финансиски и буџетски одредби

Целта е членство во 2030 година

Албанија, која ги започна преговорите заедно со Македонија во јули 2022 година, со ова го заокружува отворањето на сите кластери. Амбицијата на Тирана е да ги заврши преговорите до крајот на 2027 година. По ова би следела процедурата за ратификација (која трае 18 до 24 месеци), со надеж дека Албанија би можела да стане полноправна членка на ЕУ во 2030 година.