„ВОЈНА СО БАЛОНИ“: Лукашенко ќе заплени 1.200 камиони ако Литванија не ја отвори границата

Белорускиот претседател Александар Лукашенко се закани дека ќе заплени околу 1.200 литвански камиони кои се задржани во Белорусија, откако Литванија ја затвори границата поради инциденти со шверцерски балони кои пренесувале цигари.

Литванија, која е членка на НАТО и ЕУ, на 29 октомври затвори два гранични премини. Причината беа шверцерски балони што летале од Белорусија и предизвикале нарушување на воздушниот сообраќај на аеродромот во главниот град Вилнус, пренесува „Еуроњуз“.

Литванските власти тврдат дека овие инциденти се дел од антизападни хибридни активности на Белорусија, која е сојузник на Русија. Тие најавија дека границата ќе остане затворена најмалку до крајот на ноември.

Повеќе од само камиони – Лукашенко возвраќа на „измамата“

Лукашенко го осуди затворањето на границата и го оцени како „измама и дел од хибриден напад“ против Белорусија, порачувајќи дека Литванија сама треба да се справи со шверцот. Белоруските власти одбиле да отворат коридор исклучиво за евакуација на блокираните 1.200 литвански камиони, барајќи Литванија повторно целосно да ја отвори границата.

– Ако Литванија не ја отвори границата во наредните неколку дена, ќе донесеме одлука во согласност со нашиот закон и можеби ќе ги конфискуваме возилата – се закани Лукашенко.