Драма во Белград: Сите деца евакуирани, момчето од „Рибникар“ остана само во оштетената клиника

Пукнати цевки, оштетени темели и итна евакуација

Проблемите со безбедноста на објектот започнале пред околу две недели по сериозна хаварија со водоводните инсталации. Според сведочењата на вработените, излевањето на водата довело до оштетување на дел од темелите и опасно слегнување на земјиштето. Оштетувањата се најкритични во делот каде што се наоѓа Центарот за аутизам.

Берово те очекува

A Airbnb ◎ Instagram

Поради ваквата состојба, околу 15 пациенти од невролошкото и психијатриското одделение биле итно отпуштени на домашно лекување или пренасочени во други здравствени установи, меѓу кои и познатата клиника „Лаза Лазаревиќ“. Со ова, болницата практично останала празна, со исклучок на еден, строго чуван пациент.

Момчето од „Рибникар“ под строг надзор чека преместување

Додека останатите деца се на безбедно, малолетникот кој во мај 2023 година уби девет ученици и еден чувар во училиштето на Врачар, остана единствениот пациент во установата. Бидејќи во моментот на злосторството имал само 13 години, тој кривично не одговара, туку е подложен на психијатриско лекување и опсервација.

Од Министерството за здравство на Србија информираа дека одлуката за иселување ја донела директорката на клиниката самостојно, врз основа на наоди од приватно ангажирани вештаци, потенцирајќи дека надлежната државна градежна инспекција сè уште не извршила официјален надзор. Засега останува непознато кога и во која установа ќе биде префрлено момчето од „Рибникар“.

„Тој и понатаму е во клиниката и се води како пациент на нашата установа, со целосна заштита. Не знаеме што ќе се случува понатаму, но веруваме дека ќе се најде решение и дека безбедно ќе биде преместен.“ — изјави извор од клиниката за српските медиуми.