Весна Љ.
Пречкртано име на мапата и уставни пречки
Иницијативата започна со објава на социјалната мрежа Truth Social, која подоцна беше споделена и од официјалниот профил на Белата куќа на платформата „Икс“. На објавената фотографија се гледа контурата на сојузната држава каде зборот „Мексико“ е пречкртан со црвена боја и заменет со зборот „Америка“, без никакво дополнително официјално образложение. Сепак, за разлика од географските објекти каде претседателот има надлежност да менува називи во федералните бази, според Уставот на САД претседателот нема законско право еднострано да го смени името на една сојузна држава без иницијатива и согласност од самата држава, чие име датира уште од 16-тиот век и е постаро од самата унија.
Серија географски преименувања: Залив, езеро, па океани
-
Пулсот на пивото
699 ден
524.25 ден
Овој потег не е изолиран настан, туку продолжение на претседателските декрети за географски промени. На првиот ден од својот мандат во јануари 2025 година, Трамп го преименуваше Мексиканскиот Залив во „Залив Америка“, додека неодамна, во ек на трговски спор со Канада, со извршна наредба го смени името на езерото Онтарио во „Езеро Америка“. Најавите одат уште подалеку, со најава за преименување и на самите океани.
„Имаме залив и имаме езеро. Сега ни треба уште океан. Можеби ќе мораме да го смениме името на Атлантскиот и/или на Тихиот Океан. Можеби ќе ги смениме и двата“, изјави претходно американскиот претседател.
Остри осуди од раководството на Њу Мексико
Предлогот веднаш наиде на жесток отпор кај локалните претставници и демократите. Гувернерката на Њу Мексико, Мишел Лухан Гришам, го обвини Трамп дека користи евтини манипулации за да го сврти вниманието на јавноста од поскапувањето на горивата и воените операции во Иран, децидно порачувајќи дека „за името на Њу Мексико воопшто не се дискутира“. На сличен став е и сенаторот Мартин Хајнрих, кој порача дека секогаш ќе ги користи историските имиња: Мексикански Залив, Езеро Онтарио и Њу Мексико.
