Повеќе од само умор: Зошто ни е очајно потребен витаминот Д, а зимата ни го краде

Кога стрелките ќе се поместат наназад, а денот ќе стане краток и сив, на нашето тело му станува сè потешко од сонцето да извлече доволно витамин Д.

Токму тогаш настапува сезоната на умор, недостаток на енергија и сета онаа невидлива исцрпеност која многумина ја нарекуваат „зимски пад“.

Регистрираната нутриционистка и менаџерка за развој на рецепти во компанијата Green Chef, Лили Килинг, објаснува зошто витаминот Д е толку важен и како да го задржиме во телото дури и кога сонцето едвај се појавува.

Зошто ни е неопходен витаминот Д

– Витаминот Д е клучен за здрави коски, мускули и заби, бидејќи му помага на телото правилно да го апсорбира калциумот, објаснува Лили.

Кога го нема доволно, последиците се чувствуваат преку замор, болки во мускулите, па дури и чувство на постојана исцрпеност. Експертите препорачуваат внес од околу 10 микрограми дневно, но просечен човек внесува едвај третина од таа количина – особено во есен и зима, кога сончевите зраци повеќе не можат да ја завршат работата.

Храна богата со витамин Д

Постојат неколку намирници кои можат да помогнат да го надоместите недостатокот:

• масна риба, како што се лосос и скуша
• жолчка од јајце
• печурки (особено оние одгледувани на сонце)
• растителни млека како соино и бадемово, ако се збогатени со витамин Д

Порција од 80 до 100 грама печурки може да ги покрие дневните потреби за витамин Д, наведува Лили. Тоа е отприлика една голема портобело, десетина бели или пет костенови печурки.

Како во зима да задржите доволно витамин Д

Најважно е во исхраната редовно да се појавуваат споменатите намирници, но и да обрнете внимание на декларациите – многу производи денес се дополнително збогатени со витамини и минерали.

– Дури и мала промена, како замена на обичното млеко со растително млеко кое содржи витамин Д, може да направи голема разлика, вели Лили.

Во деновите кога светлината трае кратко, а телото бара енергија, овие едноставни трикови помагаат да ја премостите зимата без пад на имунитетот и расположението.