ПОМОШ ЗА НАСТРАДАНИТЕ ВО КОЧАНИ: Две држави нудат долготрајна терапија!

Министерот за здравство Арбен Таравари денеска соопшти дека две странски држави се понудиле да обезбедат поспецијализирана и подолготрајна терапија за пациентите кои се лекуваат од повредите здобиени во пожарот во Кочани.

Тој истакна дека оваа понуда ќе биде од голема помош за пациентите кои ќе имаат потреба од поинтензивна рехабилитација.

Таравари информираше дека главни центри за рехабилитација во земјата ќе бидат Ковид-центарот во ГОБ „8 Септември“ и Институтот за рехабилитација и физикална медицина во Козле. Тој изрази надеж дека бројот на пациенти на кои ќе им треба долготрајна рехабилитација ќе биде мал.

Министерот додаде дека во случај да има многу тешки случаи, постои можност тие да бидат испратени на лекување во странство, без трошоците да паднат на товар на Фондот за здравствено осигурување или Министерството за здравство.

Претходно денеска, Министерството за здравство објави дека во земјата пристигнале тимови од странство со богато искуство во рехабилитација на пациенти со изгореници. Овие тимови во моментов вршат евалуација на просторните услови и медицинската опрема во неколку центри за рехабилитација.